Liverpool var nokkrum sekúndum frá falli

Ian Ayre, framkvæmdarstjóri Liverpool, segir að það megi ekki gleyma því hversu nálægt félagið var því að fara í greiðslustöðvun á sínum tíma.

Dómstólar í Bretlandi neyddu þáverandi eigendur félagsins, Bandaríkjamennina Tom Hicks og George Gillett, að selja hlutabréf sín í félaginu til Fenway Sports Group sem yfirtók Liverpool árið 2010.

Skuldastaða Liverpool var erfið og félagið hársbreidd frá því að fara í greiðslustöðvun áður en John Henry og hans menn í FSG komu að málunum.

„Fólk vill stundum gleyma hversu slæm staðan var,“ sagði Ayre við enska fjölmiðla. „Ég hef rætt við fólk og margir eru afar fljótir að gleyma. Það hefur svo mikið gerst síðan við náðum loksins að snúa stöðunni okkur í vil.“

„Það er ekkert leyndarmál að við vorum nálægt því að lenda í algjörum hörmungum með félagið. Það var hræðilegt að fylgjast með þessu.“

Ayre segir að staða félagsins í dag sé afar traust og að nýir eigendur hafi byggt það upp af miklum myndarskap.

Liverpool trónir nú á toppi ensku úrvalsdeildarinnar og getur með sigri á Chelsea á sunnudag tekið risastórt skref í átt að sínum fyrsta meistaratitli á Englandi í 24 ár.