Boyd fékk þriggja leikja bann fyrir að hrækja á Joe Hart

George Boyd, vængmaður Hull, var í dag úrskurðaður í þriggja leikja bann af enska knattspyrnusambandinu fyrir að hrækja á Joe Hart, markvörð Manchester City.

Atvikið kom upp í seinni hálfleik í leik liðanna á KC-vellinum um síðustu helgi sem City vann, 2-0. Hart ásakaði Boyd um að dýfa sér í teignum og reyna fiska vítaspyrnu og læstu þeir þá höfðum saman.

Skoski landsliðsmaðurinn missir af næstu þremur leikjum Hull í ensku úrvalsdeildinni gegn West Bromwich, West Ham og Stoke.

Hann verður kominn aftur fyrir heimaleikinn gegn Swansea í næsta mánuði og viku áður en liðið mætir Sheffield United í undanúrslitum enska bikarsins.

Boyd neitaði upphaflega ásökunum Harts en sjálfstæð aganefnd innan knattspyrnusambandsins skoðaði upptökur af leiknum og úrskurðaði leikmanninn eftir það í leikbann.