Sturridge: Torres sagði mér að fara til Liverpool

Daniel Sturridge, framherji Liverpool, segir að Fernando Torres hafi sannfært sig um að ganga í raðir félagsins þegar það reyndi að lokka hann frá Chelsea í ársbyrjun í fyrra.

Liverpool keypti Sturridge fyrir tólf milljónir punda en hann hefur farið á kostum á leiktíðinni og skorað 18 deildarmörk.

Þegar tilboðið kom frá Chelsea og Sturridge íhugaði hvort hann ætti að færa sig frá höfuðborginni til Liverpool var það spænski framherjinn Fernando Torres sem mælti með sínu gamla félagi.

„Torres talaði alltaf mjög vel um Liverpool. Þegar við vorum hjá Chelsea saman sagði hann alltaf að Liverpool væri frábært félag. Og það var ekki bara hann. YossiBenayoun tók í sama streng. Þeir sögðu báðir að þetta væri besta félag sem þeir höfðu spilað fyrir,“ segir Sturridge í viðtali í Daily Mail í dag.

„Þeir sögðu báðir að stuðningsmennirnir láta manni líða frábærlega og á þeim tíma var það eitthvað sem mig vantaði í líf mitt. Mér leið ekki vel á þeim tíma.“

„Mér þarf að líða vel með sjálfan mig þannig það var auðveld ákvörðun að fara til Liverpool. Faðir minn, frændi minn og ég vorum allir sammála um að þetta væri besti staðurinn fyrir mig,“ segir Daniel Sturridge.