Rodgers hlakkar til að leika á heimavelli á ný

Enska úrvalsdeildarfélagið Liverpool hefur ekki leikið á heimavelli sínum Anfield Road síðan 23. febrúar þegar liðið lagði Swansea 4-3. Síðan þá hefur liðið leikið þrjá útileiki og unnið alla með þriggja marka mun.

Liverpool hefur leikið þrjá útileiki í mars. Fyrstu tvo þeirra vann liðið 3-0, hinn þriðja 6-3 í gær gegn Cardiff. Liverpool hefur því skorað 12 mörk gegn þremur í þessum útileikjum en Brendan Rodgers hlakkar engu að síður mikið til að mæta Sunderland á heimavelli á miðvikudaginn.

„Í sannleika sagt hlakka ég til leiksins á miðvikudaginn. Mér líður eins og við höfum spilað heima í langan tíma,“ sagði Brendan Rodgers eftir sigurinn á Cardiff í gær.

„Við eigum nú fimm leiki á Anfield og þrjá leiki úti. Anfield er einstakur staður til að leika fótbolta á.

„Nánasta framtíð er það eina sem þú getur einbeitt þér að. Stuðningsmennirnir mega trúa og dreyma, það er mikilvægt,“ sagði Rodgers um titilvonirnar.

Liverpool er í öðru sæti ensku úrvalsdeildarinnar, fjórum stigum á eftir Chelsea en á einn leik til góða. Manchester City er einnig í titilbaráttunni en liðið er þriðja sæti, tveimur stigum á eftir Liverpool en á þrjá leiki til góða á topplið Chelsea.