Sjálfsmark John Terry færði Crystal Palace þrjú stig

Topplið Chelsea tapaði óvænt 0-1 á móti Crystal Palace í ensku úrvalsdeildinni í dag og þetta tap gæti reynst afdrifaríkt í baráttunni um enska meistaratitilinn.

Chelsea er enn í efsta sæti ensku úrvalsdeildarinnar en Manchester City getur nú tekið toppsætið af Chelsea-liðinu með sigri á Arsenal seinna í dag.

Það var sjálfsmark fyrirliðans John Terry sem réð úrslitum á Selhurts Park en heimamenn í Crystal Palace áttu frábæran dag og voru óheppnir að bæta ekki við mörkum í leiknum.

Jose Mourinho, knattspyrnustjóri Chelsea, þurfti því að horfa upp á annað tap á stuttum tíma á móti liði úr neðri hlutanum en Chelsea tapaði 0-1 fyrir Aston Villa fyrir tveimur vikum.

Stigin þrjú eru gulls ígildi fyrir lærisveina Tony Pulis en þetta var fimmti 1-0 sigur liðsins síðan að hann tók við liðinu í lok nóvember.

Palace-maðurinn Yannick Bolasie fékk fínt færi í fyrri hálfleiknum og Crystal Palace átti líklega að fá vítaspyrnu þegar Gary Cahill virtist brotlegur í vítateignum. Palace-menn voru beinskeyttari en Chelsea-liðið í fyrri hálfleiknum.

Jose Mourinho sendi Oscar inn á sem varamann í hálfleik en Chelsea-mönnum tókst ekki að ná almennilegum tökum á leiknum og það voru því heimamenn sem skoruðu fyrsta markið í leiknum.

John Terry, fyrirliði Chelsea, varð þá fyrir því óláni að skalla boltann í eigið mark eftir fyrirgjöf frá Joel Ward. Crystal Palace var því komið í 1-0 en það voru 38 mínútur eftir.

Jason Puncheon var nálægt því að koma Crystal Palace í 2-0 eftir flotta skyndisókn og sendingu frá Cameron Jerome.

Chelsea reyndi að ná inn jöfnunarmarkinu en liðsmenn Crystal Palace ógnuðu hvað eftir annað í skyndisóknum. Cameron Jerome átti meðal annars skot í stöngina og Jason Puncheon fékk fínt færi en Petr Cech varði.