Moyes: Sir Alex hefði líka verið í vandræðum á þessu tímabili

David Moyes, knattspyrnustjóri Manchester United, heyrir lítið annað en gagnrýnisraddir þessa dagana enda gengur illa hjá liðinu í ensku úrvalsdeildinni. Hann sjálfur segir vandamálið vera leikmannahópurinn en ekki stjórinn.

Manchester United er í sjöunda sæti og með 26 stigum færra en á sama tíma í fyrra þegar Sir Alex Ferguson var knattspyrnustjóri félagsins. United vann 38 titla undir stjórn Sir Alex þar af ensku úrvalsdeildina þrettán sinnum.

Manchester United mætir Aston Villa á Old Trafford í hádeginu í ensku úrvalsdeildinni og hafa harðir stuðningsmenn félagsins safnað fyrir mótmælaborða og flugvél til að fljúga með hann yfir vellinum fyrir leikinn.

„Ef Sir Alex væri með liðið þá væri þetta einnig erfitt fyrir hann. Það hefði ekki skipt öllu. Þetta tímabil hefur verið svo ólíkt því Man United liði sem við þekkjum. Við verðum samt bara að halda áfram að byggja upp liðið, bæta okkur og verða betri," sagði David Moyes á blaðamannafundi fyrir leikinn á móti Aston Villa.

Eftir flottan sigur á Olympiacos í Meistaradeildinni í síðustu viku og sigur á West Ham í framhaldinu átti United-liðið ekki möguleika í nágranna sína í Manchester City á þriðjudaginn.

„Fólk gerir sér grein fyrir því að þessi leikmannahópur er að eldast og allir knattspyrnustjórar hefðu verið í vandræðum með lið Manchester United á þessu tímabili," sagði Moyes.

Hér fyrir ofan má sjá kynningu á leikjum dagsins í ensku úrvalsdeildinni.