Tvö rauð er Chelsea missteig sig á Villa Park

Chelsea sótti ekki gull í greipar Aston Villa í dag er topplið ensku deildarinnar kom í heimsókn á Villa Park.

Leikurinn var nokkuð fjörugur en liðunum gekk afar illa að koma tuðrunni yfir línuna. Vendipunktur leiksins kom á 68. mínútu en þá var Willian, leikmanni Chelsea, vikið af velli. Hann fékk þá sitt annað gula spjald.

Leikmenn Villa nýttu sér liðsmuninn vel og hófu að sækja að marki Chelsea. Það var svo Fabian Delph sem skoraði sigurmark leiksins átta mínútum fyrir leikslok með frábærri afgreiðslu.

Upp úr sauð í lok leiksins er Ramires fékk einnig að líta rauða spjaldið fyrir að traðka á leikmanni Villa. Jose Mourinho, stjóri Chelsea, var í kjölfarið rekinn upp í stúku fyrir mótmæli. Ekki góður dagur hjá Chelsea.

Chelsea er eftir sem áður með sex stiga forskot á toppi deildarinnar en Man. City á þrjá leiki á liðið og getur því komist á toppinn með því að vinna þá.

Aston Villa komst upp í tíunda sæti deildarinnar með sigrinum.