Ítalinn sem reynir að kaupa Leeds sveik undan skatti

Kaup ítalska kaupsýslumannsins MassimoCellino, eiganda Cagliari, á enska B-deildarfélaginu Leeds gætu verið í uppnámi eftir að hann var dæmdur til að greiða skattayfirvöldum á Ítalíu væna summu fyrir að svíkja undan skatti.

Cellino keypti sér myndarlega skútu frá Bandaríkjunum en gaf hana ekki upp til skatts. Ákæruvaldið vildi fá 1,165 milljónir Evra frá Cellini en hann var dæmdur til að greiða 600.000 Evrur eða jafnvirði 94 milljónir króna auk þess sem skútan var tekin af honum.

Ítalinn samþykkti kaup á 75 prósent hlut í Leeds af eignarhaldsfélaginu Gulf Finance House í síðasta mánuði og ætlaði stjórn ensku deildakeppninnar að taka málið fyrir í apríl.

Svo gæti farið að komi verði í veg fyrir söluna þar sem skýrt ákvæði er í reglum ensku deildarinnar um að dæmdir fjárglæframenn mega ekki eiga vera stjórnarmenn í enskum félögum eða eiga meira en 30 prósent hlut í félagi þar í landi.

Þessi 57 ára gamli Ítali er með annan dóm á bakinu en árið 2001 falsaði hann bókhald og var dæmdur. Þá er verið að rannsaka í tengslum við byggingu á Quartu Sant'Elena-velli Cagliari-liðsins en þar var farið illa með opinbert fé.