Hló er hann hleypti af byssu sinni

Samantha Taylor, fyrrverandi kærasta hlauparans Oscars Pistorius, bar vitni í dag í réttarhöldunum sem nú fara fram í Pretoríu í Suður-Afríku.

Pistorius er gefið að sök að hafa banað Reevu Steenkamp í íbúð hlauparans aðfaranótt Valentínusardags, 14. febrúar, í fyrra.

Þegar talið barst að byssueign hlauparans í réttarhöldunum sagði Taylor viðstöddum frá því hvernig Pistorius missti einu sinni stjórn á skapi sínu og hleypti skotum af byssu sinni út um sóllúgu á bílnum sínum.

Oscar Pistorious hafði reiðst lögreglu sem stöðvaði hann fyrir hraðakstur og séð byssu hlauparans í framsæti bílsins.

Taylor segir Pistorius hafa hlegið meðan hann hleypti af skotunum.

Hlauparinn „var alltaf með byssuna á sér“ og átti það til að snöggreiðast, sagði Samantha Taylor fyrir rétti í dag.

Samband þeirra Pistorius hófst þegar Taylor var sautján ára gömul en þegar talið barst að sambandsbrestum þeirra brast Samantha Taylor í grát. Sagði hún að hlauparinn hafi haldið tvisvar sinnum fram hjá henni meðan samband þeirra stóð yfir.

Steininn tók svo alveg úr þegar Pistorius fór með Reevu Steenkamp á afhendingu Suður-Afrísku íþróttaverðlaunanna árið 2012.

Myndbrot af vitnisburði Samönthu Taylor má sjá hér að neðan.