Mourinho: Ómögulegt að halda í við City

Jose Mourinho, stjóri Chelsea, hefur sent forráðamönnum Manchester City tóninn fyrir leik liðanna í ensku úrvalsdeildinni í kvöld.

Mourinho segir að það verði ómögulegt að keppa við City ef liðið fær að eyða peningum í leikmenn án takmarkanna.

„Ef knattspyrnuyfirvöld vilja gera það ómögulegt að halda í við City þá er það vel hægt,“ sagði Mourinho við enska fjölmiðla.

Knattspyrnusamband Evrópu, UEFA, hefur undanfarin ár starfað að því að innleiða reglur um fjármálaumhverfi knattspyrnufélaga og að takmarka óeðlilega eyðslu þeirra.

Mourinho segir að Chelsea hafi hagað sínum málum í samræmi við reglurnar. „Það er því ýmislegt sem hefur reynst ómögulegt fyrir okkur,“ sagði Mourinho.

„Ef UEFA nær að innleiða reglurnar (e. Financial Fair Play) og útskýra þær almennilega fyrir fólkinu þá mun það ef til vill gera sér grein fyrir að sum félög eru ólíkari öðrum.“

Manchester City og Chelsea eigast við klukkan 20.00 í kvöld. City kemst með sigri á topp ensku úrvalsdeildairnnar en Chelsea er í þriðja sætinu, þremur stigum á eftir City og fimm á eftir toppliði Arsenal.