Swansea sparkar Laudrup

Enska úrvalsdeildarfélagið Swansea hefur rekið knattspyrnustjórann Michael Laudrup. Þetta kemur fram á heimasíðu félagsins.

„Þessa ákvörðun var erfitt að taka,“ segir Huw Jenkins, stjórnarformaður Swansea. „Hún var hins vegar tekin með hagsmuni Swansea City að leiðarljósi.“

Orðrómur hefur verið í allan dag um að Laudrup myndi víkja. Hann hefur neitað að skuldbinda sig til langs tíma hjá velska liðinu og þrálátlega orðaður við önnur félög.

„Þetta er í fyrsta skipti í næstum tíu ár sem leiðir félagsins og stjóra skilja með þessum hætti. Við urðum hins vegar að eyða óvissunni,“ segir Jenkins sem fundaði í síðasta skipti með Laudrup í dag til að reyna að leysa málin. Allt kom fyrir ekki.

Garry Monk, leikmaður Swansea, mun stýra liðinu þar til annað verður ákveðið. Honum til aðstoðar verður aðalliðsþjálfarinn Alan Curtis.