Solskjær fær Zaha á láni frá sínu gamla félagi

Ole Gunnar Solskjær er búinn að fá það í gegn að fá vængmanninn Wilfried Zaha á láni frá Manchester United en þetta kemur fram á Sky Sports. Zaha birti mynd af sér í æfingabúningi Cardiff á samfélagsmiðli.

Manchester United keypti hinn 21 árs gamla Wilfried Zaha á fimmtán milljónir punda frá Crystal Palace á síðasta tímabili en Zaha hefur gengið illa að fóta sig á Old Trafford.

Wilfried Zaha hefur ekki enn byrjað úrvalsdeildarleik með United-liðinu (samtals 30 mínútur) en fær væntanlega að spila mikið hjá Cardiff sem er að berjast fyrir lífi sínu í deildinni.

Wilfried Zaha var með 6 mörk og 10 stoðsendingar í 43 leikjum með Crystal Palace í ensku b-deildinni í fyrra.

Ole Gunnar Solskjær hefur verið duglegur að styrkja Cardiff-liðið síðan að hann tók við en hann skipti meðal annars á Kenwyne Jones og Peter Odemwingie.