Zouma nýjasti leikmaður Chelsea

Chelsea tilkynnti í dag að félagið hefði fest kaup á hinum nítján ára Kurt Zouma sem leikur sem varnarmaður hjá St. Etienne í Frakklandi.

Zouma hefur verið lánaður strax aftur til franska félagsins og mun spila með liðinu til loka tímabilsins.

Hann er hávaxinn miðvörður og hefur komið við sögu í tólf leikjum með St. Etienne sem er í fjórða sæti frönsku úrvalsdeildarinnar. Zouma er þar að auki leikmaður U-21 landsliðs Frakka.

Zouma gekk í raðir St. Etienne fimmtán ára gamall en er fæddur í Lyon. Hann á alls að baki 52 leiki með liðinu og hefur skorað í þeim fjögur mörk.