Dani Osvaldo lánaður til Juventus

Southampton hefur samþykkt að lána ítalska framherjann Dani Osvaldo til ítölsku meistaranna í Juventus en hann hefur aðeins verið í sex mánuði í enska boltanum.

Dani Osvaldo varð dýrasti leikmaður Southampton í sumar þegar félagið keypti hann frá Roma fyrir 12,8 milljónir punda.

Osvaldo náði aðeins að skora 3 mörk í 13 leikjum í ensku úrvalsdeildinni og var settur í tveggja vikna agabann á dögunum fyrir að ráðast á liðsfélaga á æfingu.

Dani Osvaldo hafði áður verur dæmdur í þriggja leikja bann fyrir uppþot á hliðarlínunni í leik á móti Newcastle í desember.

Dani Osvaldo labbar reyndar ekkert inn í liðið hjá Juve því fyrir í framlínusveit liðsins eru kappar eins og Carlos Tevez, Fernando Llorente, Fabio Quagliarella og Mirko Vucinic.