Sunderland vann þriðja sigurinn í röð á Newcastle

Fabio Borini, lánsmaður frá Liverpool, skoraði eitt og lagði upp annað þegar Sunderland vann 3-0 útisigur á nágrönnunum í Newcastle í ensku úrvalsdeildinni á St James' Park í dag. Adam Johnson var einnig áfram á skotskónum hjá Newcastle.

Sunderland hefur þar með unnið þrjá deildarleiki í röð á móti Newcastle sem hafði ekki gerst síðan árið 1923.  Sigurinn í dag var sannfærandi hjá Sunderland en margir leikmenn liðsins áttu mjög góðan leik.

Newcastle byrjaði því ekki vel án Yohan Cabaye en besti leikmaðurinn var seldur til franska liðsins PSG í vikunni. Liðið var líka án framherjans Loic Remy sem er í banni.

Stuðningsmenn Newcastle létu óánægju sína vel í ljós og það er ljóst að það eru erfiðir tímar framundan hjá Alan Padrew og lærisveinum hans.

Sunderland komst í 2-0 í fyrri hálfleiknum. Fyrst skoraði Fabio Borini úr vítaspyrnu á 19. mínútu sem Phil Bardsley fékk og fjórum mínútum síðar fylgdi Adam Johnson á eftir þegar Tim Krul varði skot frá Jack Colback.

Jack Colback skoraði þriðja markið á 80. mínútu eftir laglegan undirbúning frá Fabio Borini.

Sunderland hefur nú unnið tvo leiki í röð og fengið 10 stig af 12 mögulegum í síðustu fjórum leikjum sínum. Adam Johnson hefur skorað í öllum fjórum leikjunum samtals sex mörk.