Gylfi fékk ekki eina mínútu þegar Tottenham tapaði stigum

Tottenham tapaði dýrmætum stigum í dag þegar liðið náði aðeins 1-1 jafntefli á útivelli á móti Hull. Tottenham datt fyrir vikið niður í sjötta sæti deildarinnar.

Tottenham var reyndar heppið að halda stigin því Hugo Lloris bjargaði vel frá Nikica Jelavić undir lok leiksins.

Gylfi Þór Sigurðsson var tekinn út úr byrjunarliðinu eftir skellinn á móti Manchester City í vikunni og íslenski landsliðsmaðurinn fékk ekkert að spreyta sig í dag. Paulinho og Nabil Bentaleb voru á miðjunni og þeir Aaron Lennon og Christian Eriksen á köntunum.  Tim Sherwood notaði aðeins einn varamann í leiknum.

Nýi maðurinn hjá Hull, Shane Long, kom liðinu í 1-0 strax á 12. mínútu eftir að hafa sloppið í gegn eftir sendingu Nikica Jelavić.

Paulinho jafnaði metin á 61. mínútu efti að misheppnað skot Danny Rose hafnaði hjá honum og Brasilíumaðurinn nýtti sér það og skoraði með góðu skoti.