Mata mættur til Manchester

David Moyes, knattspyrnustjóri Manchester United, var mættur til þess að taka á móti Spánverjanum Juan Mata sem ferðaðist frá London í þyrlu í dag.

Framundan er læknisskoðun hjá spænska landsliðsmanninum sem að óbreyttu gengur í raðir Englandsmeistaranna frá Chelsea. Kaupverðið er talið vera um 40 milljónir punda.

Gangi allt að óskum ætti Spánverjinn að geta spilað með Manchester United er liðið mætir Aroni Einari Gunnarssyni og félögum í Cardiff í ensku úrvalsdeildinni á þriðjudagskvöld. Margir stuðningsmenn United fagna komu Mata enda hefur gengið illa undanfarnar vikur hjá Englandsmeisturunum. Liðið hefur til að mynda fallið út úr báðum bikarkeppnunum heima fyrir gegn Swansea annars vegar og Sunderland hins vegar.

Post by Manchester United.