Brendan Rodgers ekki bjartsýnn á að fá nýja leikmenn

Brendan Rodgers, knattspyrnustjóri Liverpool, er ekki bjartsýnn á að geta styrkt leikmannahópinn áður en glugginn lokar um mánaðarmótin. Rodgers var spurður út í leikmannamál Liverpool-liðsins á blaðamannafundi fyrir leikinn á móti Everton á morgun.

Liverpool missti meðal annars af Basel-manninum Mohamed Salah sem fór til Chelsea en sá hinn sami mun leysa af Juan Mata sem er kominn til Manchester United.

„Við verðum bara að bíða og sjá til. Það eru í það minnsta engin félagsskipti í býgerð. Við litum á það þannig að ef við gætum styrkt liðið þá myndum við gera það. Við erum með hóp sem mátti ekki við mörgum meiðslum og við höfum verið óheppnir á leiktíðinni," sagði Brendan Rodgers.

„Ég vil samt ekki fá leikmenn til að safna varabirgðum. Við þurfum menn til að styrkja byrjunarliðið okkar. Ef við finnum ekki slíka leikmenn þá gerist ekkert. Félagið er samt á fullu að leita uppi leikmenn. Við munum ekki hætta fyrr en glugginn lokar," sagði Rodgers.