Mata byrjaði vel með Manchester United

Manchester United vann 2-0 sigur á Cardiff City á Old Traford í kvöld í fyrsta leik Spánverjans Juan Mata með United-liðinu. Ole Gunnar Solskjær þurfti því að sætta sig við tap í endurkomu sinni á Old Trafford.

United-liðið eyddi metupphæð í Mata í vikunni og hann átti fína innkomu í liðið eins og Robin Van Persie sem skoraði sínum fyrsta leik síðan í byrjun desember.

Robin van Persie var ekki lengi að skora í sínum fyrsta leik eftir að hafa misst úr ellefu leiki vegna meiðsla. Van Persie skoraði þá með skalla á sjöttu mínútu. Hollendingurinn fylgdi þá eftir sínum skalla sem var varin og skalla Antonio Valencia þar á undan sem fór í slána. Juan Mata átti mikinn þátt í uppbyggingu marksins.

Leikurinn jafnaðist eftir markið en United steig stórt skref í átta að sigrinum þegar Ashley Young skoraði annað markið með frábæru langskoti á 59. mínútu.

Juan Mata var vel fagnað þegar hann fékk heiðursskiptingu á 84. mínútu leiksins en stuðningsmenn félagsins eru sannfærðir um að Spánverjinn geti blásið lífi í liðið sem hefur verið í óvenju miklu basli á þessu tímabili.

Aron Einar Gunnarsson sat allan tímann á bekknum hjá Cardiff City í kvöld.