Liverpool fór illa með nágrannana í Everton

Liverpool skoraði þrjú mörk í fyrri hálfleik og vann öruggan 4-0 sigur á Everton á Anfield í Merseyside-slagnum í ensku úrvalsdeildinni í kvöld.

Liverpool var bara stigi á undan Everton í töflunni fyrir leikinn og sigurinn því gríðarlega mikilvægur í baráttunni um sæti í Meistaradeildinni.

Stuðningsmenn Liverpool brosa örugglega út að eyrum út vikuna eftir frábæran sigur en hann hefur Liverpool-mönnum miklu meira en montréttinn í borginni enda mikið undir í kvöld.

Steven Gerrard kom Liverpool í 1-0 á 21. mínútu með skalla eftir hornspyrnu Luis Suárez en um leið varð Everton fyrir miklu áfalli þegar Romelu Lukaku meiddist við það að rekast á liðsfélaga í horninu.

Daniel Sturridge gerði síðan nánast út um leikinn með tveimur mörkum á tveimur mínútum, það fyrri eftir frábæra stungusendingu Philippe Coutinho og það síðara með því að lyfta boltanum yfir Tim Howard eftir langa sendingu fram frá Kolo Touré.

Luis Suárez innsiglaði síðan sigurinn með marki á 50. mínútu leiksins og eftir það var aðeins formsatriði að klára leikinn.

Daniel Sturridge fékk tækifæri til að ná þrennunni í seinni hálfleiknum en skaut yfir úr vítaspyrnu.

Liverpool er nú þremur stigum á eftir Chelsea og með þriggja stiga forskot á Tottenham.