Reyndi að svindla á Tottenham

Ónefndur Króati setti sig í samband við Tottenham með það fyrir augum að selja félaginu hollenskan unglingalandsliðsmann.

Króatinn falsaði gögn sem áttu að sýna að hann hafði heimild til að ganga frá sölu á Luc Castaignos, leikmanni FC Twente.

Þegar forráðamenn Tottenham höfðu samband við kollega sína í Hollandi könnuðust þeir ekkert við málið. FC Twente greindi svo frá málinu á heimasíðu sinni eftir að hafa vísað því áfram til knattspyrnuyfirvalda.

„Við sendum umræddum aðila bréf og báðum hann um að hætta þessu undir eins,“ sagði Gert-Jan Nijweide, fjármálastjóri FC Twente.