Sjö mörk í nágrannaslagnum - úrslit kvöldsins í enska boltanum

Christian Benteke tryggði Aston Villa 4-3 sigur í mögnuðum nágrannaslag á móti West Bromwich Albion í ensku úrvalsdeildinni í kvöld en fjórir síðustu leikirnir í 23. umferðinni fóru þá fram.

Manchester City komst á toppinn eftir 5-1 stórsigur á Tottenham og Adam Johnson var hetja Sunderland á móti Stoke. Chelsea tapaði sínum fyrstu stigum á árinu 2014 þegar liðið gerði markalaust jafntefli við West Ham.

West Bromwich Albion komst í 0-2 á fyrstu tíu mínútum á móti Aston Villa en Villa-menn voru komnir 3-2 yfir í leiknum eftir 38 mínútna leik. WBA jafnaði aftur en það var síðan vítaspyrna frá Christian Benteke sem færði Aston Villa öll þrjú stigin.

Adam Johnson skoraði eina markið á 17. mínútu þegar Sunderland vann 1-0 sigur á Stoke. Stoke missti Steven N'Zonzi af velli með sitt annað gula spjald á 54. mínútu en Stoke var engu að síður nálægt því að jafna ekki síst þegar Ryan Shawcross skallaði í slána. Sunderland komst upp úr fallsæti með þessum mikilvæga sigri.

West Ham náði í mikilvægt stig á Brúnni í kvöld þegar nágrannarnir Chelsea og West Ham gerðu markalaust jafntefli. Chelsea var búið að vinna fimm deildarleiki í röð og átti möguleika að komast upp fyrir Arsenal í töflunni með tveggja marka sigri.  Leikmenn West Ham börðust hetjulega allar 96 mínúturnar og fögnuðu vel unnu stigi í lokin.

Manchester City er komið á toppinn eftir 5-1 sigur á Gylfa Þór Sigurðssyni og félögum á White Hart Lane í kvöld. Tottenham var manni færri síðustu 40 mínútur leiksins. Úrslitin réðust þó eiginlega á 50. mínútu þegar Danny Rose felldi Edin Džeko og fékk bæði rautt spjald og dæmt á sig víti sem Yaya Touré nýtti og kom City í 2-0.

Tottenham tapaði fyrri leiknum 0-6 á Ethiad-leikvanginum í Manchester og endar því með markatöluna 1-11 á móti City á þessari leiktíð.



Úrslit og markaskorarar í ensku úrvalsdeildinni:

Aston Villa - West Bromwich 4-3

0-1 Chris Brunt (4.), 0-2 Sjálfmark (9.), 1-2 Andreas Weimann (12.), 2-2 Leandro Bacuna (24.), 3-2 Fabian Delph (37.), 3-3 Youssouf Mulumbu (43.), 4-3 Christian Benteke, víti (64.)

Chelsea - West Ham 0-0

Sunderland - Stoke 1-0

1-0 Adam Johnson (17.)

Tottenham - Manchester City 1-5

0-1 Sergio Agüero (15.), 0-2 Yaya Touré, víti (51.), 0-3 Edin Džeko (53.), 1-3 Étienne Capoue (59.), 1-4 Stevan Jovetić (78.), 1-5 Vincent Kompany (89.)