Arsenal ekki að skoða Berbatov

Arsene Wenger, stjóri Arsenal, staðfesti á blaðamannafundi í morgun að félagið væri ekki að íhuga kaup á Dimitar Berbatov, sóknarmanni Fulham.

The Sun fullyrti í gær að Arsenal hefði áhuga á kappanum og að félagið væri reiðubúið að borga tvær milljónir punda fyrir hann.

„Berbatov er ekki nafn sem við höfum íhugað eins og er,“ sagði Wenger í morgun en talið er að hann sé að leita leiða til að styrkja sóknarlínu Arsenal, ekki síst eftir meiðslavandræði sóknarmanna liðsins.

„Við erum nú búnir að missa Nicklas Bendtner í meiðsli. Ökklinn leit ágætlega út hjá Olivier Giroud en hann er nú veikur,“ sagði Wenger og bætti við að þeir Kieran Gibbs og Aaron Ramsey myndu einnig missa af leik liðsins um helgina.

Arsenal mætir Tottenham í ensku bikarkeppninni á morgun. „Enski bikarinn er sérstök keppni og öll félög vilja vinna bikarinn. Þetta verður hörð rimma við Tottenham eins og alltaf.“