Smalling baðst afsökunar á búningnum

Chris Smalling, leikmaður Manchester United, neyddist til að biðjast afsökunar á búningi sem hann klæddi sig nú fyrir jól.

Smalling og kærasta hans héldu búningaveislu fyrir vini og ættingja fyrir jólin en mynd af Smalling úr veislunni var lekið í fjölmiðla nú í vikunni.

Búningur Smalling líktist sprengjuvesti, líku því sem er notað í sjálfsmorðsárásum, nema í stað sprengjanna var hann með tómar Jägermeister-flöskur og Red Bull-dósir á vestinu.

„Hann var þar með að líkja eftir hinum vinsæla Jägerbomb-drykk. Hann gerir sér nú grein fyrir því að það hafi verið óviðeigandi og biðst afsökunar á því. Hann meinti ekkert illt með þessu,“ sagði í yfirlýsingu frá umboðsskrifstofu Smalling um málið.

Smalling er 24 ára gamall varnarmaður og óvíst hvort að honum verði refsað sérstaklega af félaginu fyrir þetta. Forsíðu enska blaðsins The Sun má sjá hér fyrir neðan.

TODAY'S front page of THE SUN pic.twitter.com/PdbJYFjXkZ

— The Sun Newspaper (@TheSunNewspaper) January 9, 2014