Aguero aftur frá í einn mánuð

Argentínumaðurinn Sergio Aguero hjá Manchester City er enn á ný meiddur og knattspyrnustjórinn Manuel Pellegrini staðfesti á blaðamannafundi í dag að leikmaðurinn verði ekkert með næsta mánuðinn.

Sergio Aguero tognaði aftan í læri í 5-1 sigrinum á Tottenham í vikunni en hann hafði áður komið sínu liði í 1-0 í leiknum.  Hann er með 15 mörk og 8 stoðsendingar í 17 leikjum í ensku úrvalsdeildinni þar af mark í fimm fyrstu leikjum sínum (í deild og bikar) eftir kálfameiðslin.

Aguero var þarna aðeins að byrja sinn þriðja leik eftir að hann missti út mánuð vegna kálfameiðsla. Hann hefur því verið óheppin með meiðsli á leiktíðinni.

Aguero missir af mörkum leikjum þar á meðal stórleiknum við Chelsea á mánudaginn sem og fyrri leiknum á móti Barcelona í 16 liða úrslitum Meistaradeildarinnar.

„Við erum vissulega að missa einn af okkar bestu leikmönnum en hann er samt nýkominn til baka eftir meiðsli. Við höfum Edin Dzeko, Alvaro Negredo og nú Stevan Jovetic sem eru allir að skora. Við eigum því góða menn til að leysa hann af," sagði Manuel Pellegrini, knattspyrnustjóri Manchester City.