Nældi Fulham í hinn nýja Cantona?

Fulham keypti í dag gríska framherjann Konstantinos Mitroglou frá Olympiakos fyrir um 11 milljónir punda eða um rúmlega tvo milljarða íslenskra króna.

Þessi 26 ára landsliðsframherji Grikkja skoraði meðal annars þrjú mörk í tveimur umspilsleikjum á móti Rúmenum þegar gríska landsliðið tryggði sér sæti á HM í Brasilíu. Hann hefur skorað 14 mörk í 12 leikjum með Olympiakos í grísku deildinni á leiktíðinni.

Roy Carroll, fyrrum markvörður Manchester United, spilar með Olympiakos og hann er ekki í vafa um að Fulham hafi þarna gert góð kaup.

„Ég hef þekkt hann í tvö ár hjá Olympiakos og hann hefur spilað vel á hæsta stigi í Meistaradeildinni og hefur verið duglegur að skora fyrir okkur," sagði Roy Carroll í útvarpsviðtali á BBC Radio 5.

„Hann hefur verið markahæstur í grísku deildinni undanfarin tvö ár, er bara 26 ára og ástríðufullur gagnvart fótboltanum," sagði Carroll.

„Eric Cantona var frábær leikmaður og einn af þeim bestu en Konstantinos er mjög öflugur. Ég man eftir að hafa horf á Cantona spila í sjónvarpinu og hvernig hann hélt boltanum framarlega á vellinum. Konstantinos er slíkur leikmaður," sagði Carroll.