Liverpool í kapphlaupi við tímann - Yevhen í læknisskoðun

Liverpool er að gera allt til þess að ganga frá kaupum sínum á Úkraínumanninum Yevhen Konoplyanka áður en félagsskiptaglugginn lokar í kvöld en leikmaðurinn er í læknisskoðun samkvæmt heimildum Sky Sports.

Yevhen Konoplyanka er 24 ára gamall vængmaður sem kemur frá Dnipro Dnipropetrovsk. Forráðamenn Liverpool hafa verið í samningaviðræðum við úkraínska félagið í vikunni en Tottenham hafði einnig áhuga á leikmanninum,.

Dnipro Dnipropetrovsk vill fá fimmtán milljónir punda fyrir leikmanninn en Liverpool er enn ekki búið að ganga frá kaupunum. Konoplyanka þarf að gangast undir læknisskoðunina í Úkraínu og Liverpool þarf líka að útvega honum dvalar- og atvinnuleyfi áður en hann kemur til liðsins.

Yevhen Konoplyanka var með 3 mörk og 3 stoðsendingar í þremur leikjum í Evrópudeildinni á leiktíðinni og hefur skorað 8 mörk í 34 landsleikjum fyrir Úkraínu. Eitt marka hans kom á móti Englandi a Wembley í undankeppni HM.