Rodgers ætlar að láta til sín taka á leikmannamarkaðnum

Brendan Rodgers, stjóri Liverpool, hefur áður talað um hversu erfitt það hafi verið að fá leikmenn til félagsins þar sem það sé ekki í Meistaradeildinni.

Liverpool verður væntanlega í Meistaradeildinni næsta vetur í fyrsta skipti síðan leiktíðina 2009-10.

Stjórinn væntir þess að þá verði auðveldara að fá leikmenn á Anfield. Þó svo hann fái líklega nóg af peningum til að eyða í leikmenn þá ítrekar hann mikilvægi þess að vera með skýra stefnu sem leikmenn trúi á.

"Þegar leikmenn fara að trúa á stefnu þjálfarans þá er hægt að ná árangri. Það er ekki hægt að kaupa slíkt. Lið geta eytt milljörðum en það er ekki trygging fyrir einu né neinu," sagði Rodgers.

"Við munum reyna að kaupa háklassaleikmenn en það þarf meira til. Það er gott að fá peninga og við munum keppa á markaðnum en það má ekki gleyma að hafa augun á stefnu liðsins og hvernig maður vill sjá félagið vaxa."