Liverpool missteig sig á The Hawthorns

Skelfileg mistök Kolo Toure kostuðu Liverpool stigin þrjú í 1-1 jafntefli Liverpool gegn West Bromwich Albion í ensku úrvalsdeildinni í dag á The Hawthorns. Liverpool er sex stigum frá toppliði Manchester City eftir leikinn en toppliðin þrjú eiga leik til góða.

Daniel Sturridge skoraði sitt fjórtánda mark á tímabilinu um miðbik fyrri hálfleiks þegar hann var mættur á fjærstöng og stýrði fyrirgjöf Luis Suarez í autt netið.

Kolo Toure gerði skelfileg mistök í jöfnunarmarki WBA, Toure sem aftasti maður reyndi þá slaka sendingu á Martin Skrtel sem fór beint á Victor Anichebe og átti fyrrum Everton maðurinn ekki í vandræðum með að skora framhjá Simon Mignolet í marki Liverpool.

Þrátt fyrir nokkrar ágætis tilraunir náðu þeir rauðklæddu ekki að ógna marki heimamanna af alvöru og lauk leiknum því með jafntefli. Liverpool situr því í  fjórða sæti, tveimur stigum á undan nágrönnum sínum í Everton, þremur stigum á undan Tottenham og sjö stigum á undan Manchester United.