Sanogo: Kom til Englands á einum fæti

Yaya Sanogo, leikmaður Arsenal og franska U21 árs landsliðsins, sem verður í eldlínunni í kvöld í leik Íslands og Frakklands er viss um að fyrsta mark sitt fyrir Arsenal komi fljótlega.

Sanogo sem varð 21 árs í upphafi ársins hefur leikið 16 leiki fyrir Arsenal en ekki enn tekist að skora fyrsta mark sitt. Sanogo skoraði fjögur mörk í æfingarleik í sumar en honum hefur ekki tekist að finna netmöskvana enn á þessu tímabili.

„Það tekur sinn tíma að aðlagast, þegar ég kom til Englands var ég á einum fæti. Ég þurfti nokkra mánuði til að aðlagast hörkunni hérna, ég fór úr því að spila í 2. deildinni í Frakklandi í að berjast við varnarmenn á borð við Vincent Kompany. Ég var of hræddur á síðasta tímabili við að meiðast,“ sagði Sanogo sem segist vera viss um að hann geti slegið í gegn hjá Skyttunum.

„Ég hef tekið miklum framförum undanfarna mánuði, maður lærir af því að leika fyrir jafn stórt félag og Arsenal er. Aðdáendurnir eru eflaust orðnir örlítið óþolinmóðir en ég er viss um að þegar fyrsta markið kemur þá muni ég byrja að skora reglulega.“