Moyes missti af Coentrao

Manchester United gerði tilraun til þess að fá Fabio Coentrao að láni frá Real Madrid rétt áður en félagaskiptaglugganum í Evrópu var lokað í gærkvöldi.

David Moyes, stjóri United, hafði sýnt mikinn áhuga á að fá Leighton Baines frá Everton. Ljóst var í gær að ekkert yrði úr kaupum á enska vinstri bakverðinum og horfði Moyes þá í átt til Spánar.

Fyrstu fregnir erlendra miðla hljómuðu á þann veg að Coentrao væri á leið til United. Eftir að glugganum var lokað kom í ljós að ekki hefði tekist að ganga frá pappírsvinnunni í tæka tíð að því er Telegraph greinir frá.

Sú staðreynd að Moyes reyndi að fá tvo vinstri bakverði til liðsins bendir til þess að Skotinn sé ekki sannfærður um gæði Patrice Evra. Frakkinn hefur mannað stöðuna undanfarin ár.