Kagawa: Get ekkert gert nema leggja hart að mér

Shinji Kagawa, miðjumaður Manchester United, hefur ekki komið við sögu í fyrstu þremur leikjum Englandsmeistaranna á leiktíðinni.

Kagawa kom inn á sem varamaður í leiknum gegn Wigan um Samfélagsskjöldinn. Síðan hann fékk að hlaupa um völlinn í sjö mínútur á Wembley hefur seta á varamannabekknum verið hans hlutskipti.

„Erfiðu tímarnir halda áfram en það eina sem ég get gert er að leggja hart að mér,“ hefur Sky Sports eftir japanska miðjumanninum. Kagawa er sem stendur með landsliði Japan sem mætir Gvatemala og Gana í æfingaleikjum á næstunni.

Aðspurður hvort hann yrði áfram á Old Trafford játaði sá japanski því. Stuðningsmenn Dortmund hafa hvatt forráðamenn félagsins til þess að endurheimta Kagawa sem sló í gegn hjá þýska liðinu leiktímabilið 2011-2012.