Knattspyrnugoðsögn hjá Arsenal orðin heimilislaus

Kenny Sansom, fyrrum leikmaður Arsenal og þrautreyndur landsliðsmaður Englands, hefur viðurkennt að hann sé í dag heimilislaus.

Sansom segir í viðtali við The Sun hafa glímt við áfengisvandamál lengi auk þess að eiga við spilafíkn að stríða.

„Ég hef verið heimilislaus í tíu daga," segir Sansom í viðtalinu þar sem hann segist sofa á bekkjum í almenningsgörðum. Fjölskylda hans hefur miklar áhyggjur og segir Sansom hafa horfið og aðeins eiga 20 pund í vasanum. Hann hafi rétt heimsótt systur sína en svo haldið út í óvissuna.

„Ástæðan er sú að ég á enga peninga og er fyllibytta. Mér líður illa og ég er fjárhættuspilar," segir Sansom. Varnarmaðurinn spilaði á sínum tíma 86 landsleiki fyrir England og er sannarlega goðsögn hjá stuðningsmönnum Arsenal.

Sansom hafði um 1200 pund í vikulaun þegar best lét hjá Arsenal sem svarar til rúmlega 200 þúsund íslenskra króna á núvirði. Óhætt er að fullyrða að Sansom hefði haft mun hærri tekjur væri hann atvinnumaður í dag. Engu að síður lifði hann flottu lífi, bjó í húsi sem metið var á um 200 milljónir króna og spilaði tvívegis með Englandi á heimsmeistaramótum.

Sansom er fráskilinn og hefur selt flestar landsliðstreyjur sínar til að fjármagna áfengisneyslu sína.

Fjölmargir breskir knattspyrnumenn hafa átt í vandræðum með áfengisneyslu eða spilafíkn í gegnum tíðinda. Má þar nefna Paul Gascoigne, Paul McGrath og Paul Merson sem dæmi.