Tottenham að bæta félagsmetið í þriðja sinn í sumar

Erik Lamela, framherji Roma á Ítalíu, er kominn til London til þess að ganga frá félagsskiptum sínum yfir í Tottenham. London Evening Standard segir frá þessu í dag.

Tottenham og Roma hafa verið í viðræðum síðustu tvær vikur en Tottenham fór á fullt í málið eftir að félagið missti af Willian til Chelsea.

Tottenham mun væntanlega greiða 30 milljónir punda fyrir þennan 21 árs gamla argentínska kantmann en Tottenham hafði áður boðið 25,5 milljónir í leikmanninn.

Það fylgir fréttinni í London Evening Standard að Erik Lamela muni fá 66 þúsund pund í vikulaun eða 12,3 milljónir íslenskra króna.

Með þessum kaupum væri Tottenham að bæta félagsmetið í eyðslu í í þriðja sinn í sumar en félagið hefur áður borgað 17 milljónir punda fyrir Brasilíumanninn Paulinho og 26 milljónir punda fyrir Spánverjann Roberto Soldado.

Erik Lamela var með 15 mörk og 5 stoðsendingar í 33 leikjum í ítölsku A-deildinni á síðustu leiktíð.