Alan Hansen: Chelsea verður meistari með Wayne Rooney

Alan Hansen, fyrrum fyrirliði og margfaldur meistari með Liverpool en núna knattspyrnuspekingur BBC, skrifaði pistil í Daily Telegraph í morgun þar sem hann velti fyrir sér áhrifum þess hvar Wayne Rooney muni spila á komandi tímabili.

„Ég tel að baráttan um þjónustu Wayne Rooney hafi úrslitáhrif í baráttunni um titilinn því ég tel að það verði ómögulegt fyrir Manchester United að halda titlinum fari Rooney yfir til Chelsea," skrifar Alan Hansen í pistli sínum.

„Ef Wayne Rooney fer til Chelsea þá mun Chelsea verða enskur meistari. Ég er algjörlega öruggur á því. Ef hann verður hinsvegar áfram á Old Trafford þá á David Moyes mun meiri möguleika á að vinna titilinn á sínu fyrsta ári," skrifar Hansen.

Wayne Rooney er 27 ára gamall og hefur spilað með Manchester United frá 2004. Á þeim tíma hefur hann unnið enska meistaratitilinn fimm sinnum nú síðast í vor þar sem hann var með 12 mörk í 27 leikjum í ensku úrvalsdeildinni.