„Ég hef stefnt að þessu allan minn feril“

Aron Einar Gunnarsson komst í gær í góðan hóp Íslendinga sem hafa skorað í ensku úrvalsdeildinni í knattspyrnu.

Landsliðsfyrirliðin gerði sér lítið fyrir og skoraði fyrsta mark í sögu Cardiff City þegar liðið bar sigur úr býtum, 3-2, gegn Manchester City í 2. umferð ensku úrvalsdeildarinnar í gær.

Aron jafnaði metin í 1-1 þegar um hálftími var eftir af leiknum og það var síðan liðsfélagi hans Fraizer Campbell sem bætti við tveimur mörkum fyrir Cardiff.

„Það var vissulega mjög sérstakt að skora þetta mark fyrir lið eins og Cardiff ,“ segir Aron Einar Gunnarsson í samtali við Fréttablaðið í gær.

„Það sem skipti samt sem áður mestu máli voru stigin sem við fengum í dag og að liðið sé komið í gang. Það reiknaði enginn með því að við myndum fá eitthvað út úr þessum leik en það var frábært fyrir okkur, við unnum okkur inn smá virðingu frá hinum liðunum í deildinni.“

Liðsheildin er lykillinn að þeim árangri sem Cardiff hefur náð í gegnum árin að mati Arons.

„Við vorum allir að vinna mikið fyrir hvorn annan í dag og við verðum að halda því áfram í þessari deild. Leikmenn Manchester City eru eflaust með meiri gæði en við en það skipti bara engu máli í dag, við fórum í gegnum þetta saman sem lið.“

Það hefur alltaf verið markmiðið hjá Aroni að komast í ensku úrvalsdeildina og nú er markmiðinu náð.

Setti stefnuna á úrvalsdeildina

„Ég hef stefnt að þessu allan minn feril og ég er virkilega stoltur af því að vera kominn í þessa deild svona ungur. Nú ætla ég bara að njóta þess að spila í bestu deild í heiminum.“

Aron vill meina að liðið sé nægilega gott til þess að halda sér upp í ensku úrvalsdeildinni og jafnvel gott betur en það.

„Það er búið að leggja mikla vinnu í þetta lið og ég held að Cardiff sé í fjórða sæti yfir peningum eytt í leikmenn fyrir þetta tímabil. Það er því gott fyrir mig að finna fyrir traustinu frá stjóranum og að ég sé í stóru hlutverki með liðinu.“

Cardiff tapaði fyrir West Ham United í fyrstu umferð en að sögn Arons fóru leikmenn liðsins vel í gegnum þann leik í vikunni og náðu að lagfæra ákveðin atriði.