Er mars mánuðurinn hans Gylfa?

Gylfi Þór Sigurðsson átti þátt í tveimur af þremur mörkum Tottenham í 3-0 sigri á Internazionale í fyrrakvöld í fyrri leik liðanna í 16 liða úrslitum Evrópudeildarinnar. Gylfi lagði upp fyrsta mark leiksins fyrir Gareth Bale og skoraði síðan annað markið sjálfur, en það var fyrsta mark hans á White Hart Lane.

Gylfi hefur nú átt þátt í marki hjá Tottenham í þremur leikjum í röð og hefur komið sér framar í goggunarröðinni meðal miðjumanna liðsins. Markið sem hann skoraði eftir að hafa komið inn á sem varamaður á móti West Ham létti mikilli pressu af Gylfa, sem hefur litið út eins og nýr og endurfæddur maður í undanförnum tveimur leikjum. Báðir hafa þetta verið stórleikir og í þeim báðum var Gylfi í byrjunarliðinu.

Frammistaða Gylfa er mikið ánægjuefni enda voru efasemdaraddir farnar að heyrast eftir að hann fékk fá sem engin tækifæri í byrjunarliði André Villas-Boas, knattspyrnustjóra Tottenham, frá nóvember til febrúar.

Gareth Bale skoraði markið sitt í fyrrakvöld með laglegum skalla eftir frábæra fyrirgjöf frá Gylfa af vinstri kantinum. Gylfi var að leggja upp mark fyrir Bale annan leikinn í röð því Bale skoraði eftir glæsilega stungusendingu íslenska landsliðsmannsins í sigrinum á Arsenal um síðustu helgi. Gylfi hafði einnig gefið stoðsendingu á Bale í sigri á Aston Villa á annan í jólum, en Bale innsiglaði þá þrennu sína eftir sendingu frá Gylfa.

Þeir Gylfi og Bale eru jafnaldrar (fæddir 1989) og ná greinilega vel saman inni á vellinum. Nú þarf bara Bale að fara að jafna leikinn og gefa nokkrar stoðsendingar á Gylfa.

Það ætti kannski ekki að koma mikið á óvart að Gylfi fari í gang á þessum tíma ársins því undanfarin tvö tímabil hans í enska boltanum, með Swansea 2012 og með Reading 2010, hefur hann farið á kostum í marsmánuði.

Gylfi Þór var í miklu stuði með Reading-liðinu í mars 2010, en hann skoraði fimm mörk og lagði upp önnur fjögur mörk í leikjum liðsins í ensku b-deildinni í mánuðinum. Hann skoraði einnig eitt mark í fyrsta leik aprílmánaðar.

Gylfi fékk ekki að spila mikið með Hoffenheim í mars 2011 og átti ekki þátt í neinu marki á þeim 86 mínútum sem hann spilaði í þýsku deildinni í mánuðinum.

Gylfi var frábær með Swansea-liðinu í mars í fyrra og skoraði meðal annars tvö mörk í tveimur leikjum í mánuðinum. Hann var síðan kosinn besti leikmaður ensku úrvalsdeildarinnar í mánuðinum og varð fyrsti íslenski leikmaðurinn sem hlýtur slík verðlaun.

Fram undan er leikur Tottenham á móti Liverpool á Anfield Road, sem hefði allt eins getað verið heimavöllur Gylfa í vetur. Hann valdi Tottenham frekar en að spila fyrir sinn gamla stjóra Brendan Rodgers, sem var með hann hjá bæði Reading og Swansea. Það verður því fróðlegt að sjá hvað Gylfi gerir í leiknum á sunnudaginn.