Zaha segist aldrei hafa hitt dóttur Moyes

Þrálátur orðrómur hefur verið í gangi um að Wilfried Zaha, leikmaður Man. Utd, væri að slá sér upp með dóttur knattspyrnustjórans, David Moyes, við litlar vinsældir stjórans.

Hafa menn tengt þann orðróm við þá staðreynd að Zaha fær ekkert að spila hjá Moyes. Zaha hefur nú ákveðið að svara fyrir sig.

"Ég verð að svara fyrir þessar röngu sögur. Ég hef aldrei hitt dóttur Davids þannig að meint samband mitt við hana er ekki ástæðan fyrir því að ég spila ekkert. Ég mun spila þegar stjórinn telur mig vera tilbúinn," skrifaði Zaha á Twitter - greinilega búinn að fá nóg af sögunum.

Það var Sir Alex Ferguson sem keypti Zaha á 15 milljónir punda og leikmaðurinn var svo lánaður til félagsins sem hann var keyptur frá, Crystal Palace, í fyrra.