Apamaðurinn fékk þriggja ára bann

Stuðningsmaður Sunderland sem beitti Romelu Lukaku kynþáttaníði hefur verið dæmdur í átján mánaða skilorðsbundið fangelsi fyrir athæfi sitt.

Atvikið átti sér stað í viðureign Sunderland gegn West Brom á Ljósvangi á liðinni leiktíð. West Brom hafði sigur í leiknum og Lukaku var sem oftar í aðalhlutverki.

Stuðningsmaðurinn, hinn 22 ára gamli Liam Jones, játaði sök en viðurkenndi þó ekki að hafa leikið eftir apa til að níða Lukaku. Jones sagðist einfaldlega hafa verið að taka fugladansinn margfræga.

Á það féllst dómarinn í málinu hins vegar ekki og dæmdi Jones auk þess í þriggja ára bann frá knattspyrnuleikvöngum á Englandi.