Sigur hjá Birni en jafnt hjá Kára

Björn Bergmann Sigurðarson kom inn á sem varamaður hjá Wolves sem vann 4-0 sigur á Gillingham í ensku c-deildinni í knattspyrnu í dag.

Björn Bergmann hefur átt við meiðsli að stríða en kom inn á um miðjan síðari hálfleikinn. Wolves bætti við einu marki eftir innkomu Skagamannsins.

Kári Árnason var líkt og venjulega í byrjunarliði nýliða Rotherham sem gerðu markalaust jafntefli við Preston North End. Kári fékk gult spjald í leiknum og komst nálægt því að skora í fyrri hálfleik en skalli hans fór framhjá.

Preston var einmitt mótherji Wolves í fyrstu umferðinni þar sem niðurstaðan var markalaust jafntefli. Liðsmenn Preston hafa því hvorki skorað né fengið á sig mark í fyrstu tveimur leikjum tímabilsins.