Stendur þétt við bak Joe Hart

Roy Hodgson, landsliðsþjálfari Englands í knattspyrnu, segir markvörðinn Joe Hart í heimsklassa þrátt fyrir mistök í leikjum að undanförnu.

Hodgson tilkynnti í gær landsliðshóp sinn fyrir leiki í undankeppni HM í upphafi september.

„Það þarf meira en tvo slæma leiki til þess að ég missi trú á leikmanni sem hefur verið fyrsti valkostur í langan tíma," sagði Hodgson við blaðamenn.

Hart fékk á sig tvö mörk eftir hornspyrnur í 3-2 tapi gegn Cardiff í 2. umferð ensku úrvalsdeildarinnar um helgina.

„Hjá stórliðum eins og Manchester City hafa markverðir allajafna ekki mikið að gera. Í hvert skipti sem þeir gera mistök eru þau hins vegar blásin upp."

Landsliðshóp Hodgson má sjá hér. Mesta athygli vakti að Ros Barkley hjá Everton og Andros Townsend hjá Tottenham voru valdir í hópinn.