Villas-Boas þarf að ræða fjarveru Bale

Knattspyrnustjóri Tottenham, Andre Villas-Boas, mun þurfa að útskýra á blaðamannafundi í dag hvers vegna Gareth Bale mætti ekki á æfingu liðsins í Lundúnum í gær.

Tottenham mætir Dinamo Tibilisi í umspili um sæti í riðlakeppni Evrópudeildar á fimmtudag og er blaðamannafundurinn í dag af því tilefni. Tottenham vann fyrri leikinn ytra 5-0 og því með níu tær af tíu í riðlakeppninni. Áhugi blaðamanna á fundinum mun því beinast fyrst og fremst að stöðu Gareth Bale.

Samkvæmt heimildum Sky vill Spurs ekki selja Bale til Real Madrid fyrr en gengið hefur verið frá kaupum á einum sterkum leikmanni til viðbótar. Þá eru forráðamenn Spurs allt annað en ánægðir með að Real hafi sett upp svið í Madríd þar sem kynna átti Bale til leiks í gær.

Forráðamenn Real hafa að sögn Sky tekið treyjur merktar Bale úr sölu til þess að friða kollega sína á Englandi. Treyja merkt velska landsliðsmanninum voru komnar í sölu á heimasíðu félagsins. Félagið sagði um mistök að ræða en forráðamenn Real hafa áður farið óhefðbundnar leiðir til þess að fá vilja sínum framgengt.

Bale var í fríi á Spáni um helgina en var mættur aftur til Lundúna þar sem von var á honum á æfingu í gær. Hann lét þó ekki sjá sig en sást funda með ráðgjöfum sínum í miðborginni í gær. Sky segir Villas-Boas ekki hafa áhyggjur af því að Walesverjinn hafi ekki mætt en muni skýra málið á fundinum í hádeginu í dag.