Manchester United lánar Real Zaragoza leikmann

Angelo Henriquez hefur yfirgefið Englandsmeistarana og spilar með spænska liðinu Real Zaragoza á þessu tímabili. Forráðamenn Manchester United hafa ákveðið að lána hann til Spánar.

Angelo Henriquez er 19 ára framherji frá Síle sem var í láni hjá Wigan Athletic á síðasta tímabili en United fékk hann frá Universidad de Chile í september í fyrra.

Henriquez spilaði með Manchester United á undirbúningstímabilinu og skoraði meðal annars jöfnunarmarkið í leik á móti sænska liðinu AIK.

Henriquez hefur raðað inn mörkum með landsliðum Síle, hann hefur skorað í tveimur fyrstu A-landsleikjunum sínum og er kominn með 21 mark í 17 leikjum með 20 ára landsliðinu.