Slátrun í fyrsta leik Pellegrini

Manchester City tók Newcastle í kennslustund í fyrsta leik City undir stjórn Manuel Pellegrini í ensku úrvalsdeildinni í knattspyrnu í kvöld. Lokatölurnar urðu 4-0 City í vil.

Spánverjinn David Silva kom heimamönnum á bragðið snemma leiks eftir stórskotahríð heimamanna að marki Tim Krul í marki Newcastle. Silva skoraði markið með skalla en Spánverjinn smávaxni er vanari því að nota fæturnar við markaskorun.

Sergio Agüero kom City í 2-0 um miðjan fyrri hálfleik með frábæru skoti með hægri fæti neðst í markhornið eftir fínan sprett. Newcastle fékk ekki á sig fleiri mörk í hálfleiknum en þurfti að sjá á eftir Steven Taylor í viðbótartíma hálfleiksins. Taylor fékk rautt spjald fyrir að slá til andstæðings og gestirnir því manni færri út leikinn.

Yaya Toure skoraði þriðja og glæsilegasta mark leiksins beint úr aukaspyrnu á 51. mínútu. Frakkinn Samir Nasri rak síðasta naglann í kistu Newcastle stundarfjórðungi fyrir leikslok.

Stórsigurinn sendir City í efsta sæti deildarinnar að lokinni 1. umferð. Liðið deilir sætinu að sjálfsögðu með nokkrum liðum en hefur bestu markatöluna.