Moyes mætir í risaslag á Anfield

David Moyes fær enn eina prófraunina í starfi stjóra Manchester United á sunnudag þegar hann mætir með strákana sína á Anfield í Liverpool. Þá getur hann unnið bug á eigin Liverpool-grýlu, en í ellefu tilraunum tókst honum aldrei að stýra Everton til sigurs á Anfield.

„Ég efast nú um að ég fái betri móttökur sem stjóri Manchester United en stjóri Everton. Það er alltaf erfitt að mæta á Anfield en ég hlakka til leiksins,“ sagði Moyes á blaðamannafundi í gær.

Liverpool hefur unnið 1-0 sigur í tveimur fyrstu leikjum sínum í deildinni. Daniel Sturridge hefur skorað bæði mörk Rauða hersins, en enski framherjinn hefur skorað tíu mörk í síðustu átta leikjum liðsins og er sjóðandi heitur.

Með sigri getur Liverpool jafnað sína bestu byrjun í ensku úrvalsdeildinni. Liðið vann síðast sigra í fyrstu þremur leikjunum í deildinni undir stjórn Roys Evans haustið 1995.

Gylfi Þór Sigurðsson verður í leikmannahópi Tottenham sem sækir Arsenal heim í Lundúnaslag. Bæði lið unnu góða sigra í Evrópukeppnum í vikunni. Tottenham hefur byrjað tímabilið á sama hátt og Liverpool, unnið tvo 1-0 sigra með mörkum Roberto Soldado úr vítaspyrnum.

Þá reyna Aron Einar Gunnarsson og félagar í Cardiff að fylgja eftir sigrinum á Manchester City um síðustu helgi þegar liðið tekur á móti Everton.