Villas-Boas hafnaði tilboðum frá PSG og Real Madrid

André Villas-Boas, knattspyrnustjóri Tottenham, segist hafa hafnað tilboðum frá stórliðunum Paris Saint-Germain og Real Madrid af því að hann vildi vera annað tímabil með Tottenham. Tottenham spilar sinn fyrsta leik á nýju tímabili í dag þegar liðið mætir nýliðum Crystal Palace á útivelli.

„Ég hélt áfram hjá Tottenham því þetta var mitt fyrsta tækifæri til að vera annað ár hjá sama félagi," sagði André Villas-Boas sem var bara eitt tímabil eða minna hjá Academica, Porto og Chelsea, liðin sem að stjórnaði áður en hann kom á White Hart Lane.

„Ég held að það gefi mér ákveðið forskot og ég er staðráðinn að láta á það reyna. Það hefur verið tekið vel á móti mér hér, ég er með flottan hóp leikmanna og vinn við bestu mögulegu aðstæður," sagði Villas-Boas.

Villas-Boas fagnar komu Franco Baldini sem er tekinn við sem íþróttastjóri félagsins. „Það er mikið framafaraskref að fá Franco til félagsins og við erum strax farnir að sjá áhirf af komu hans," sagði Villas-Boas.

Tottenham eyddi 59,5 milljónum punda í sumar í leikmennina Roberto Soldado, Paulinho, Nacer Chadli og Etienne Capoue. Það er búist við miklu af þessum nýju leikmönnum og svo bíðum við Íslendingar spenntir eftir því að sjá hvert hlutverk íslenska landsliðsmannsins Gylfa Þórs Sigurðssonar verður á þessu tímabili.