Notaði n-orðið ítrekað

Samtök atvinnumanna í knattspyrnu á Englandi hafa verið gagnrýnd fyrir að fá grínistann Reginald D. Hunter til þess að skemmta á hófi sínu í gærkvöldi.

Gareth Bale var bæði kjörinn besti leikmaðurinn og besti ungi leikmaðurinn en gamanmál Hunter vakti ekki síður athygli. Beindi hann spjótum sínum að Luis Suarez hjá Liverpool sem nýlega var einn þeirra sem tilnefndur var sem besti leikmaðurinn.

Í frétt Dailymail kemur fram að Hunter hafi ítrekað notað n-orðið til þess að skjóta á Suarez. Suarez var á sínum tíma dæmdur í keppnisbann fyrir að kynþáttaníð í garð Patrice Evra hjá Manchester United. Þá hafa samtök atvinnuknattspyrnumanna einnig staðið í stórræðum á leiktíðinni í máli John Terry og Anton Ferdinand. Sá fyrrnefndi hlaut bann fyrir kynþáttaníð í garð Ferdinand.

Clarke Carlisle, forseti samtakanna, viðurkenndi að það hefðu verið mistök að fá Hunter til þess að skemmta.

„Sem forseti samtakanna þá skammast ég mín. Ég biðst innilega afsökunar og þetta mun ekki endurtaka sig á meðan ég er formaður," sagði Carlisle.

„Ég tel okkur hafa gert slæm mistök við valið á skemmtiatriðum gærkvöldsins."