Best að loka markaðnum áður en tímabilið hefst

Alan Pardew, stjóri Newcastle, er á því að endurskoða þurfi tímamörkin á félagaskiptaglugganum. Honum finnst ótækt að markaðurinn sé enn opinn þegar enska úrvalsdeildin byrjar.

Pardew er alveg brjálaður yfir því að Arsenal sé að reyna að kaupa Yohan Cabaye frá félaginu. Arsenal sendi inn tíu milljón punda tilboð nokkrum tímum fyrir leik Newcastle og Man. City.

Það var víst meira en Cabaye þoldi og hann var því ekki í leikmannahópi liðsins er Newcastle steinlá, 4-0.

Pardew er á því að Arsenal hefði átt að bíða fram á morgun með tilboðið og fannst þessi hegðun félagsins léleg.

"Við þurfum að skoða það að loka glugganum áður en tímabilið hefst. Ég veit að forráðamenn ensku deildarinnar hafa lagt þetta fram til forráðamanna annarra deilda í Evrópu. Þetta þarf að skoða ítarlega," sagði Pardew.