Ekki lengur pláss fyrir Borini á Anfield

Fabio Borini, ítalski framherjinn hjá Liverpool, er á leiðinni til landa síns Paolo Di Canio á láni samkvæmt fréttum í enskum fjölmiðlum. Sunderland fær Borini á láni út þetta tímabil.

Brendan Rodgers, knattspyrnustjóri Liverpool, hefur ekki notað Fabio Borini á tímabilinu og eftir að Liverpool fékk Victor Moses á láni frá Chelsea var ljóst að það var ekki lengur pláss fyrir ítalska 21 árs landsliðsmanninn á Anfield.

Daniel Sturridge, Luis Suárez, Iago Aspas, Luis Alberto og Victor Moses eru allir á undan Borini í goggunarröðinni.

Fabio Borini meiddist illa á síðasta tímabili og missti fyrir vikið af enda tímabilsins. Borini skoraði 2 mörk í 20 leikjum á sínu fyrsta tímabili með Liverpool.

Sunderland þarf á liðstyrk að halda því lærisveinar Paolo Di Canio hafa aðeins náð í eitt stig í fyrstu þremur umferðunum.