Tottenham missir miðjumann í fjórar vikur

Miðjumaðurinn Etienne Capoue meiddist illa á ökkla í tapi Tottenham á móti Arsenal í ensku úrvalsdeildinni um helgina og nú er orðið ljóst að meiðslin eru það alvarleg að Capoue verður frá keppni næstu fjórar vikurnar.

Capoue lenti undir Santi Cazorla, leikmanni Arsenal, og var borinn sárþjáður af velli.  

Etienne Capoue er 25 ára varnatengiliður sem er ekki í beinni samkeppni við Gylfa Þór Sigurðsson sem spilar mun framar á vellinum. Gylfi kom ekki við sögu í leiknum á móti Arsenal.

Tottenham keypti Capoue á 9,3 milljónir punda (1,7 milljarðar íslenskra króna) frá franska liðinu Toulouse um miðjan ágúst.